ថ្មីៗកន្លងទៅនេះមានសេចក្តីរាយការណ៍ថា ក្រុមមន្ត្រីប្រចាំទីតាំងជញ្ជីងថ្លឹងរថយន្តនៅក្នុងស្រុកអង្គស្នួល ខេត្តកណ្តាល បានធ្វើឲ្យប្រជាពលរដ្ឋនិងមជ្ឈដ្ឋាននានារិះគន់យ៉ាងពេញបន្ទុកព្រោះមន្ត្រីទាំងនោះ គិតតែពីរឿងប្រមូលលុយតាមរបៀបពុករលួយ ហើយមិនខ្វល់ពីរឿងរថយន្តដឹកលើសទម្ងន់ឬ មិនលើសទម្ងន់នោះទេ។ ឈ្មួញនិងអាជីវករមួយចំនួនដែលដឹកជញ្ជូនទំនិញឆ្លងកាត់ផ្លូវជាតិ លេខ៤ចូលមករាជធានីភ្នំពេញ បានអះអាងថាទោះបីពួកគេដឹកទំនិញលើសទម្ងន់ឬមិនលើសទម្ងន់គឺត្រូវតែបង់លុយឲ្យក្រុមជញ្ជីងថ្លឹងរថយន្តនៅស្រុកអង្គស្នួល តាមការកំណត់ទើបអាចចៀសផុតពីការរំខាន។
ចំណែកមន្ត្រីតូចតាចក្នុងមន្ទីរសាធារណការនិងដឹកជញ្ជូនខេត្តកណ្តាល បានឲ្យដឹងថាលោក ម៉ឹង យូឡេង ប្រធានមន្ទីរសាធារណការខេត្តកណ្តាល គឺជាអ្នកបើកដៃឲ្យក្រុមមន្ត្រីប្រចាំទីតាំងជញ្ជីងថ្លឹងរថយន្តក្នុងស្រុកអង្គស្នួល ប្រមូលលុយតាមរបៀបពុករលួយយ៉ាងងងើល។
ប្រភពពីមន្ត្រីរាជការក្នុងមន្ទីរសាធារណការខេត្តកណ្តាល បានឲ្យដឹងថាអំពើពុករលួយរបស់លោក ម៉ឹង យូរឡេង ប្រធានមន្ទីរសាធារណការនិងដឹកជញ្ជូនខេត្តកណ្តាល គឺជារឿងដែលមិនអាចបិទបាំងបានឡើយព្រោះត្រូវមន្ត្រីក្រោមឱវាទបើកកកាយជាបន្តបន្ទាប់ ប៉ុន្តែលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន បែរជាធ្វើមិនដឹងមិនឮអ្វីទៅវិញ។
ឥឡូវនេះប្រភពពីក្រុមមន្ត្រីរាជការតូចតាចក្នុងមន្ទីរសាធារណការនិងដឹកជញ្ជូនខេត្តកណ្តាលបានបង្ហើបឲ្យដឹងថាលោក ម៉ឹង យូឡេង ដែលជាប្រធានមន្ទីរនិងលោក ជួរ ឈុនឡេង ជាអនុប្រធានមន្ទីរ ព្រមទាំងបក្ខពួកមួយចំនួនកំពុងឃុបឃិតគ្នាប្រព្រឹត្តអំពើពុករលួយកាន់តែខ្លាំងថែមទៀត។ ហេតុនេះហើយទើបមានការអំពាវនាវឲ្យលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ចាត់វិធានការស៊ើបអង្កេតទៅលើរឿងអាស្រូវពុករលួយរបស់លោក ម៉ឹង យូឡេង ប្រធានមន្ទីរសាធារណការនិងដឹកជញ្ជូនខេត្តកណ្តាល ជាបន្ទាន់។
មន្ត្រីនៅក្នុងមន្ទីរសាធារណការខេត្តកណ្តាល បានបញ្ជាក់ថាលោក ជួរ ឈុនឡេង ដែលជាអនុប្រធានមន្ទីរសាធារណការខេត្ត ទទួលបន្ទុកជញ្ជីងថ្លឹងរថយន្តកំពុងប្រើអំណាចប្រមូលលុយពីរថយន្តដឹកទំនិញ ដឹកថ្ម ដឹកដី ដឹកខ្សាច់ ដឹកក្រួស យ៉ាងសប្បាយចិត្តបើទោះបីរថយន្តទាំងនោះផ្ទុកលើសទម្ងន់ឬមិនលើសទម្ងន់យ៉ាងណាក៏ដោយ។
ប្រភពបានឲ្យដឹងទៀតថា ក្រុមមន្ត្រីប្រចាំទីតាំងជញ្ជីងថ្លឹងរថយន្តនៅផ្លូវជាតិលេខ៣ ចំណុចភូមិកំពង់ទួល ឃុំអន្លង់រមៀត ស្រុកកណ្តាលស្ទឹង និងនៅស្រុកអង្គស្នួល ខេត្តកណ្តាល នៅតែប្រព្រឹត្តអំពើពុករលួយយ៉ាងក្រអឺតក្រទមបំផុត ដូច្នេះលោក ស៊ុន ចាន់ថុល រដ្ឋមន្ត្រីក្រសួងសាធារណការ មិនគួរមើលរំលងតទៅទៀតទេហើយគួរគិតគូរចាត់វិធានការទប់ស្កាត់អំពើពុករលួយរបស់មន្ត្រីក្រោម ឱវាទខ្លះផង។
ទាក់ទងបញ្ហាខាងលើនេះក្រុមឈ្មួញនិងអាជីវករដែលដឹកជញ្ជូនទំនិញឆ្លងកាត់ផ្លូវជាតិលេខ៣ជាពិសេសឆ្លងកាត់ទីតាំងជញ្ជីងថ្លឹងរថយន្តក្នុងភូមិកំពង់ទួល ស្រុកកណ្តាលស្ទឹង និងដឹកជញ្ជូនទំនិញ ឆ្លងកាត់ផ្លូវជាតិលេខ៤ បានឲ្យដឹងថាបើទោះបីពួកគាត់ដឹកទំនិញមិនលើសទម្ងន់ក៏ត្រូវបង់លុយឲ្យក្រុមមន្ត្រីពុករលួយទៅតាមការកំណត់ដែរទើបអាចចៀសផុតពីការធ្វើទុក្ខបុកម្នេញ។ ជាងនេះទៅទៀតលោក ជួរ ឈុនឡេង ដែលមានការបើកដៃពីលោក ម៉ឹង យូឡេង បានបង្កើតក្រុមមន្ត្រីចល័តឲ្យធ្វើសកម្មភាពតាមជំរិតយកលុយពីម្ចាស់រថយន្តដឹកដី ដឹកខ្សាច់ ដឹកក្រួស ដឹកថ្ម ដែលបើកបរតាមផ្លូវលំក្នុងភូមិយ៉ាងកំរោលទៀតផង។
ដូច្នេះល្មមដល់ពេលដែលលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន ចាត់ការទៅលើមន្ត្រីពុករលួយតាមច្បាប់ហើយ៕