តាមសេចក្តីរាយការណ៍ពីប្រជាពលរដ្ឋបានឱ្យដឹងថាបច្ចុប្បន្នទីតាំងអ៊ីធើណិត២៤ម៉ោង យីហោ CH Netមួយកន្លែងទៀតហើយដែលកំពុងដំណើរការយ៉ាងរលូននៅតាមបណ្តោយផ្លូវលេខ២៨៧ សង្កាត់បឹងកក់១ ខណ្ឌទួលគោក រាជធានីភ្នំពេញ ដែលមានម្ចាស់ឈ្មោះ ហ៊ុន គឹមជាតិ អនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ។ សេចក្តីរាយការណ៍ដដែលបន្តថាទីតាំងអ៊ីនធើណិតយីហោCH Net របស់លោក ហ៊ុន គឹមជាតិ មានអាជ្ញាប័ណ្ណ បានបញ្ជាក់ពីសាលារាជធានីភ្នំពេញ អនុញ្ញាតឲ្យដំណើរការសេវាកម្ម អ៊ីនធើណិត និងវិស័យព័ត៌មាន ប៉ុន្តែបែរជាលោកផ្តល់សេវាកម្មល្បែងហ្គែមបាញ់ត្រីទៅវិញ។
សូមជម្រាបដែរថា ទីតាំងអ៊ីនធើណិត យីហោ «CH Net» គឺមានច្រើនទីតាំងនៅតាមបណ្តាខណ្ឌនានាក្នុងរាជធានីភ្នំពេញ រួមមាន ខណ្ឌទួលគោក, ខណ្ឌមានជ័យ និងខណ្ឌចំការមន ជាដើម ដែលមិនមានអាជ្ញាធរណាហ៊ាងចុះបង្ក្រាបនៅឡើយទេ។
សូមបញ្ជាប់បន្ថែមដែរថា បើយោងតាមមាត្រា ៥ នៃច្បាប់ស្តីពី ការបង្ក្រាបល្បែងស៊ីសង បានចែងថា អ្នកបើកកន្លែងលេងល្បែងស៊ីសង អ្នកកាន់កាប់ល្បែងស៊ីសង អ្នកចាត់ចែង និងភ្នាក់ងារស៊ីសង នឹងត្រូវប្រឈមការផ្តន្ទាទោសដាក់ពន្ធនាគារ រយៈពេលពី ១ឆ្នាំ ទៅដល់៥ឆ្នាំ៕