លោកម៉ាក្រុង ប្រធានាធិបតីបារាំង លោក កៀរ ស្តាមែរ នាយករដ្ឋមន្ត្រីអង់គ្លេស លោកដូណាល់ ទូសក៍ នាយករដ្ឋមន្ត្រីប៉ូឡូញ និងលោក ហ្វ្រីដ្រិច មែរស៍ អធិការបតីអាល្លឺម៉ង់ បានធ្វើដំណើរទៅជួបជុំគ្នានៅរដ្ឋធានីកៀវ ជួបជាមួយលោកហ្សេឡេនស្គី កាលពីថ្ងៃទី១០ឧសភា។ ក្រៅពីដើម្បីចូលរួមកម្មវិធីបុណ្យរំឭកវិញ្ញាណក្ខន្ធ ទាហានក៏ដូចជាប្រជាជនអ៊ុយក្រែន ដែលបានស្លាប់ដោយសារសង្គ្រាមឈ្លានពានរបស់រុស្ស៊ី៣ឆ្នាំមកនេះ ថ្នាក់ដឹកនាំទាំង៥នាក់ បានជួបប្រជុំគ្នា ជាមួយលោកអគ្គលេខាធិការអង្គការអូតង់ និងតំណាងក្រុមប្រទេសស្ម័គ្រចិត្តផ្សេងទៀត ដែលត្រៀមជួយអ៊ុយក្រែន។ ថ្នាក់ដឹកនាំទាំងអស់ បាននិយាយគ្នាតាមទូរស័ព្ទជាមួយលោកដូណាល់ ត្រាំថែមទៀតផង។
នៅក្រោយកិច្ចប្រជុំនេះ អ៊ុយក្រែននិងសម្ព័ន្ធមិត្តអឺរ៉ុប បានស្នើទៅកាន់រុស្ស៊ី ឲ្យទទួលយកសំណើរបស់លោកដូណាល់ ត្រាំ ដែលទាមទារឲ្យមានបទឈប់បាញ់ជាបណ្តោះអាសន្នរយៈពេល៣០ថ្ងៃ លើសមរភូមិទាំងស្រុង មិនថាផ្លូវគោក ផ្លូវអាកាសនិងផ្លូវទឹក។ ផ្អែកតាមលោក Andriï Sybiga រដ្ឋមន្ត្រីការបរទេសអ៊ុយក្រែន គឺអ៊ុយក្រែនបានត្រៀមគោរពការផ្អាកការប្រយុទ្ធនេះចាប់ពីថ្ងៃចន្ទសប្តាហ៍ក្រោយទៅ ដើម្បីឈានទៅបើកផ្លូវចរចាសន្តិភាពជាមួយរុស្ស៊ី។
លោកម៉ាក្រុង បានអះអាងថា បារាំងក៏ដូចជាសហភាពអឺរ៉ុប នឹងត្រៀមកញ្ចប់ទណ្ឌកម្មថ្មីបន្ថែមទៅលើរុស្ស៊ី ប្រសិនបើរុស្ស៊ីនៅតែមិនទទួលយកបទឈប់បាញ់បណ្តោះអាសន្ននេះ។ លោកម៉ាក្រុងលើកឡើងទៀតថា ក្នុងករណីមានបទឈប់បាញ់ នោះត្រូវតែរៀបចំឲ្យមានការចរចា និយាយគ្នាដោយផ្ទាល់ រវាងរុស្ស៊ីនិងអ៊ុយក្រែន។ ចំណែកលោកអធិការបតីថ្មីអាល្លឺម៉ង់ ដែលទើបចូលកាន់តំណែងជាផ្លូវការ បានគំរាមថាអាល្លឺម៉ង់នឹងបន្តផ្តល់ជំនួយយោធាឲ្យអ៊ុយក្រែនច្រើនសន្ធឹក ប្រសិនរុស្ស៊ីនៅតែរឹងរូសមិនបើកផ្លូវចរចាសន្តិភាព។ នៅលើបណ្តាញសង្គមX វិញ លោកស្រី អួរស៊ូឡា វ៉ុន ដឺឡាយ៉េន ប្រធានគណកម្មការអឺរ៉ុបបានលើកឡើងថា ចាប់ពីពេលនេះទៅ គឺអ្វីៗវាស្ថិតនៅលើការសម្រេចចិត្តរបស់រុស្ស៊ីហើយ។
សូមបញ្ជាក់ថា សំណើបទឈប់បាញ់ទាំងស្រុង បណ្តោះអាសន្ន និងដោយឥតលក្ខខណ្ឌនេះ គឺត្រូវបានស្នើដោយរដ្ឋបាលលោកដូណាល់ ត្រាំ តាំងតែពីខែមីនាម្លេះ ហើយអ៊ុយក្រែនក៏បានយល់ព្រមហើយដែរ។ តែផ្ទុយទៅវិញ គឺរុស្ស៊ីដែលនៅតែមិនយល់ព្រម ដោយលើកឡើងថា ត្រូវតែធ្វើតាមការទាមទាររបស់ខ្លួនជាមុនសិន។ ថ្លែងតាមកញ្ចក់ទូរទស្សន៍ ABC អ្នកនាំពាក្យវិមានក្រេមឡាំង បានលើកឡើងថា ចង់ឲ្យមានបទឈប់បាញ់ គឺទាល់តែសម្ព័ន្ធមិត្តលោកខាងលិចសន្យាឈប់ផ្តល់អាវុធទៅឲ្យអ៊ុយក្រែនជាមុនសិន។ អ្នកនាំពាក្យរុស្ស៊ីរូបនេះអះអាងថា អំឡុងពេលនេះកងទ័ពរុស្ស៊ីកំពុងរុលទៅមុខយ៉ាងសង្ហារ ដូច្នេះបើផ្អាកការប្រយុទ្ធ៣០ថ្ងៃ គឺមិនខុសអីពីទុកពេលវេលាឲ្យអ៊ុយក្រែនប្រមូលអាវុធនិងកម្លាំងនោះទេ។
ដោយសង្កេតឃើញដំណើរអូសជើងរបស់រុស្ស៊ី លោកដូណាល់ ត្រាំ បានប្រកាសកាលពីថ្ងៃព្រហស្បតិ៍ ថារុស្ស៊ីត្រូវតែទទួលយកបទឈប់បាញ់បណ្តោះអាសន្នជាបន្ទាន់ ពុំនោះទេអាមេរិកនិងអឺរ៉ុប នឹងដាក់ទណ្ឌកម្មបន្ថែម។ គួរកត់សំគាល់ដែរ ថាគិតមកទល់ពេលនេះ រុស្ស៊ីបានសុខចិត្តផ្អាកការប្រយុទ្ធតែ៣ថ្ងៃទេ គឺពីថ្ងៃ៨ដល់ថ្ងៃ១០ឧសភា ក្នុងឱកាសបុណ្យខួបជ័យជំនះក្នុងសង្គ្រាមលោកលើកទី២។ ជាកម្មវិធីដើរដង្ហែរក្បួនយោធា ដែលលោកពូទីនបានរៀបចំឡើងនៅទីក្រុងម៉ូស្គូដើម្បីបង្អួតកម្លាំង ដោយមានប្រទេសមហាមិត្តរបស់រុស្ស៊ីជាង២០ប្រទេសចូលរួម ក្នុងនោះមានលោកស៊ី ជីនពីងផងដែរ។ តាមការសង្ស័យរបស់ស្ថានទូតអាមេរិកប្រចាំនៅអ៊ុយក្រែន រុស្ស៊ីអាចនឹងបើកការវាយប្រហារទ្រង់ទ្រាយធំមកលើអ៊ុយក្រែន ដោយប្រើមីស៊ីលបាលីស្ទីក ក្នុងរវាងប៉ុន្មានថ្ងៃខាងមុខនេះ៕