អធិការខណ្ឌទួលគោក លោក សុខហេង បានអនុវត្តផ្ទុយ និងផ្គើនទៅនឹងបទបញ្ជារបស់ លោក ឧត្តមសេនីយ៍ឯក ស ថេត ស្នងការរាជធានីភ្នំពេញ ឬប្រហែលជាអធិការរូបនេះបានទទួលបានផលប្រយោជន៍អ្វី ពីបនល្បែងនៅទីតាំងនេះហើយបានជាមិនបង្រ្កាប។
តាមសេចក្តីរាយការណ៍ពីប្រជាពលរដ្ឋបានឱ្យដឹងថាបច្ចុប្បន្នទីតាំងអ៊ីធើណិត២៤ម៉ោង យីហោ CH Netមួយកន្លែងទៀតហើយដែលកំពុងដំណើរការយ៉ាងរលូននៅតាមបណ្តោយផ្លូវលេខ២៨៧ សង្កាត់បឹងកក់១ ខណ្ឌទួលគោក រាជធានីភ្នំពេញ ដែលមានម្ចាស់ឈ្មោះ ហ៊ុន គឹមជាតិ អនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ។ សេចក្តីរាយការណ៍ដដែលបន្តថាទីតាំងអ៊ីនធើណិតយីហោCH Net របស់លោក ហ៊ុន គឹមជាតិ មានអាជ្ញាប័ណ្ណ បានបញ្ជាក់ពីសាលារាជធានីភ្នំពេញ អនុញ្ញាតឲ្យដំណើរការសេវាកម្ម អ៊ីនធើណិត និងវិស័យព័ត៌មាន ប៉ុន្តែបែរជាលោកផ្តល់សេវាកម្មល្បែងហ្គែមបាញ់ត្រីទៅវិញ។
ប្រភពពីប្រជាពលរដ្ឋមួយទៀតបានរាយការណ៍ថា ទីតាំងមួយនេះ គេសង្កេតឃើញក្រុមក្មេងទំនើង តែងតែមកចូលលេងយ៉ាងអាណាធិបតេយ្យតែមិនឃើញអាជ្ញាធរមានសមត្ថកិច្ចមូលដ្ឋាន ចុះមកទប់ស្កាត់ ឬបង្ក្រាបឡើយ។ ប្រភពបានបង្ហើបឲ្យដឹងទៀតថា ទីតាំងអ៊ិនធឺណេត ”CH net” បង្កប់ល្បែងស៊ីសងតាមប្រព័ន្ធ online ២៤ម៉ោងលើ២៤ម៉ោងខាងលើនេះ មិនមែនមានតែនៅដឹកដីខណ្ឌទួលគោកនោះទេ គឺម្ចាស់ទីតាំងបានដាក់ពង្រាយស្ទើតែគ្រប់ខណ្ឌ ក្នុងរាជធានីភ្នំពេញ។
ដូច្នេះហើយ ប្រជាពលរដ្ឋបានសំណូមពរដល់លោក ឃួង ស្រេង អភិបាល នៃគណៈអភិបាលរាជធានីភ្នំពេញ ឧត្តមសេនីយ៍ឯក ស ថេត ស្នងការរាជធានីភ្នំពេញ និងលោក ឯក ឃុនដឿន អភិបាលខណ្ឌទួលគោកតែម្តង មេត្តចាត់មន្ត្រីក្រោមឱវាទចុះទៅពិនិត្យ និងបង្ក្រាបផង។ ប្រភពដដែលបន្តថា តើឯណាទៅពាក្យថា ភូមិឃុំមានសុវត្ថិភាព៩ចំណុច របស់រាជរដ្ឋាភិបាល ដែលដាក់ឲ្យអាជ្ញាធរមានសមត្ថកិច្ចអនុវត្ថនោះ? បើភូមិឃុំកើតមាននូវល្បែងស៊ីសងពេញបន្ទុកយ៉ាងនេះ។៕
