[powr-social-media-icons id=a42588d8_1503820141863]
ឧត្តរមានជ័យ ៖ តាមសេចក្តីរាយការណ៍បានឲ្យដឹងថា ៖ មេឈ្មួញឈើដុះស្លែរដែលអ្នកផងបានហៅថាឈ្មោះ តា ប៉ាវ ដែលរស់នៅក្នុងភូមិត្រាំប៉ោង ឃុំព្រះប្រឡាយ ស្រុកត្រពាំងប្រាសាទ ខេត្តឧត្តរមានជ័យនោះ កំពុងតែសម្រុកទិញឈើប្រណិតប្រភេទលេខ(២)យ៉ាងគគ្រឹកគគ្រេងក្នុងខេត្តឧត្តរមានជ័យគ្មានការរំខានពីកម្លាំងសមត្ថកិច្ចជំនាញឡើយ។ សេចក្តីរាយការណ៍ដដែរបានបន្តថា៖ឈើប្រណិតដែលមេឈ្មួញទិញបានមកនោះគឺយកមកលាក់ទុកនៅផ្ទះឈ្មោះ ធុយ និងផ្ទះរបស់ ឈ្មោះ តា ប៉ាវ និងជាច្រើនកន្លែងផ្សេងទៀតរង់ចាំរថយន្តមកដឹកឈើចេញដើម្បីយកទៅចែកចាយតាមបណ្តាខេត្តផ្សេងៗដោយគ្មានខ្លាចក្រែងរអាច្បាប់បន្តិចសោះឡើយ ។
បើតាមប្រភពពីប្រជាពលរដ្ឋបានឲ្យដឹងថា៖មេឈ្មួញឈើដ៏ធំឈ្មោះ តា ប៉ាវ នេះដឹកជញ្ជួនឈើប្រណិតស្ទើរតែរៀងរាល់សប្តាហ៍មិនដែលឃើញមានសមត្ថកិច្ចជំនាញណាធ្វើការបង្ក្រាបឡើយ។ ប្រជាពលរដ្ឋបានបន្តថា៖ការទិញនិងដឹងជញ្ជួនឈើប្រណិតយ៉ាងគគ្រឹកគគ្រេងបានដោយរលូនបែបនេះបើមិនមានការបើកដៃនិងឃុបឃិតគ្នានោះទេគឺមិនអាចដឹកឈើទាំងនោះចេញមកបានឡើយ ។
ជាមួយគ្នានេះដែរ ប្រជាពលរដ្ឋក៏ដូចជាមជ្ឈដ្ឋានទូទៅបានលើកឡើងថា៖សព្វថ្ងៃនេះបទល្មើសព្រៃឈើបានកើតមានជាហូរហែនៅខេត្តឧត្តរមានជ័យមិនទាន់ឃើញមានសមត្ថកិច្ចជំនាញធ្វើការបង្ក្រាបបាននៅឡើយ ។ ទោះបីជាអ្នកសារព័ត៌មានធ្វើការផ្សព្វផ្សាយជាច្រើនលើកក៏ដោយ ក៏ឈ្មួញនៅតែបន្តទិញនិងដឹកជញ្ជួនឈើយ៉ាងគគ្រឹកគគ្រេងដដែរពិសេសមេឈ្មួញឈើដុះស្លែរឈ្មោះ តា ប៉ាវ នេះតែម្តងដែលកំពុងតែផ្គើនទៅនឹង អនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាយ៉ាងពេញបន្ទុកតែម្តង។
ពាក់ពន្ឋ័ទៅនឹងបទល្មើសខាងលើនេះដែរប្រជាពលរដ្ឋបានបញ្ជាក់ថា៖មន្ត្រីរដ្ឋបាលព្រៃឈើរួមទាំង មន្ត្រីបរិស្ថាន សមត្ថកិច្ចជំនាញគួរណាស់មានវិធាការបង្ក្រាប មិនគួរបណ្តែតបណ្តោយឲ្យក្រុមឈ្មួញ រកស៊ីឈើគ្មានច្បាប់ទំលាប់ដឹកឈើចេញទៅចែក ចាយតាមបណ្តាខេត្តមួយចំនួនយ៉ាងអនាធិបតេយ្យនោះទេ។ ជុំវិញរឿងបទល្មើសព្រៃឈើខាងលើនេះដែរ សារព័ត៌មានយើង រង់ចាំការបំភ្លឺពីលោក តា ប៉ាវ និងមន្ត្រីពាក់ពន្ឋ័រាល់ម៉ោងធ្វើការ ៕
