មណ្ឌលគិរី៖ បច្ចុប្បន្ននេះឈើត្រូវបានគេដឹកចេញពីក្រុមហ៊ុន ម៉ាស្ទ័រខេសាន់ របស់មេឈ្មួញ ឧកញ៉ា សិង្ហ សំអុល ដែលមានទីតាំងនៅដែនព្រៃអភិរក្សភ្នំព្រេច ក្នុងខេត្តមណ្ឌលគិរី ។ ឈើទាំងនោះត្រូវបានគេដឹកទៅកា ន់ប្រទេសវៀតណាមដោយមានដេប៉ូស្តុកនៅស្នួល ខេត្តក្រចេះ និងដឹកបន្ត ឆ្លងកាត់តាមខេត្តក្រចេះ ទៅប្រទេសវៀតណាម។ លោកឧកញ៉ា សិង្ហ សំអុល គឺជាមុខសញ្ញា នៃបទឧក្រិដ្ឋកម្មព្រៃឈើក្នុងបញ្ជីខ្មៅរបស់រដ្ឋាភិបាល ដែលត្រូវបានចង្អុលបង្ហាញកាលពីថ្ងៃទី១៥ ខែមករា ឆ្នាំ២០១៦កន្លងមក ដោយសម្ដេចនាយករដ្ឋមន្ត្រី ។
ប៉ុន្តែបើទោះជាដូច្នេះក្តីក៏ឧកញ៉ា២រូប ដែលគេស្គាល់ថាជាឈ្មួញឈើប្រណិតល្បីល្បាញគឺឧកញ៉ា សិង្ហ សំអុល និងឧកញ៉ា វ៉ន ប៊ុនថៃ បានសម្រុកដឹកឈើទៅកាន់ប្រទេសវៀតណាមដដែលៗ យ៉ាងហោចណាស់ជិត២០ឡាន ធុនធំ។ ទោះបីជាគេដឹងថាលោកសាយ សំអាល់ រដ្ឋមន្ត្រីបរិស្ថានបានបង្ហាញពីការប្តេជ្ញាចិត្តទប់ ស្កាត់និងបង្ក្រាបបទល្មើសព្រៃឈើក៏ដោយ ក៏តំបន់ព្រៃអភិរក្សដែលទទួលខុសត្រូវដោយមន្ត្រីបរិស្ថាននៅតែមានការកាប់ឈើយ៉ាងរង្គាលដដែល។
ប្រភពពីប្រជាពលរដ្ឋឲ្យដឹងថា បច្ចុប្បន្នមានការកាប់ឈើនៅព្រៃអភិរក្សភ្នំព្រេច ក្នុងខេត្តមណ្ឌលគិរី យ៉ាងរង្គាល តាមរយៈការផ្ដល់លុយទៅឲ្យក្រុមមន្ត្រីអភិរក្ស ដែលត្រូវបានគេរាយការណ៍ថា ក្នុង១ឡានចំណាយលុយ ៨រយដុល្លារអាមេរិក។ ប្រភពខាងលើបានឲ្យដឹងថាក្រុមហ៊ុនម៉ាស់ស្ទ័រខេសាន់ ដែលមានលោកឧកញ៉ាសឹង្ហ សំអុល ជានាយកក្រុមហ៊ុនបាននឹងកំពុងឲ្យឈ្មោះ(ម៉ុក) ជាប្រជាពលរដ្ឋរស់នៅក្នុងភូមិទី០១ ឃុំស្រែសង្គម ស្រុកកោះញែកកែនប្រជាពលរដ្ឋនៅក្នុងភូមិឃុំខាងលើជញ្ជូនរណាយន្តតាមមធ្យោបាយកាឡេថង និងមនុស្សម្នាជាច្រើន ចូលទៅកាប់ឈើដែលសេសសល់ជិត ក្បែរ បរិវេណដីក្រុមហ៊ុនអារជ្រៀកជាឈើគ្រឿងលក់ឲ្យក្រុមហ៊ុនលោកដោយឲ្យបុគ្គលឈ្មោះ(ម៉ុក)ជាអ្នកចាត់ចែងទូទាត់ថវិកា និងដឹកឈើចូលក្រុមហ៊ុន ដោយប្រភេទឈើសុក្រំ ក្នុងមួយម៉ែត្រគូបតម្លៃ៣៥០.០០០រៀល និង ប្រភេទផ្ចឹក គរគីតម្លៃ៤៥០.០០០រៀលក្នុងមួយម៉ែត្រគូបផងដែរ។
ប្រភពដដែលនៅបានបញ្ជាក់ទៀតថា កាលពីរដូវប្រាំងដើមឆ្នាំ២០១៧ គេឃើញមានរថយន្តប្រភេទយក្សយីឌុបនៅក្នុងបរិវេណក្រុមហ៊ុនមានមិនតិចជាង៦០ទៅ៧០គ្រឿងទេ ចេញចូលដឹកឈើពីទីនេះយកទៅក្រៅ នឹងមកទល់ពេលនេះក៍នៅមានរថយន្ត ប្រភេទនេះទុកចោលក្នុងក្រុមហ៊ុនដោយមិនអាចធ្វើចរាចរណ៍កើតដោយស្ថានភាពផ្លូវពិបាកពេកព្រោះមានភ្លៀងធ្លាក់ខ្លាំងនិង ច្រើនលើសលប់។
សម្រាប់ការលួចចេញឈើក្នុងពេលដែលគេរវល់ នឹងការឈ្លាន ពានរបស់ឡាវនេះ ក្រៅពីព័ត៌មានជាក់ស្តែងស្តីពីសកម្មភាពដឹកជញ្ជូនឈើប្រណិតទៅស្រុកយួនដោយឧកញ៉ាសិង្គ សំអុលនិងឧកញ៉ាថៃ ដែលគេជឿថាប្រាកដជាមានការឃុបឃិតគ្នាជា មួយសមត្ថកិច្ចជំនាញ និងមូលដ្ឋាន សេចក្តីរាយការណ៍ស្តីពីសកម្មភាពកាប់បំផ្លាញព្រៃឈើក្នុងតំបន់ព្រៃអនុរក្សភ្នំព្រិចមិនអាចស្វែងរកការបំភ្លឺពីអ្នកទទួលខុសត្រូវបាននៅឡើយទេ។
តាមប្រភពពីដៃជើងលោកឧកញ៉ា សឹង្ហ សំអុល បានឲ្យដឹងថា ក្រុមនេះបាននឹងកំពុងប្រើឈ្មោះ មន្ត្រីជាន់ខ្ពស់នៃខុទ្ទកាល័យសម្តេច ហ៊ុន សែន នាយករដ្ឋមន្ត្រីកម្ពុជា ដើម្បីបិទបាំង និងគំរាម មន្ត្រីជំនាញ រួមទាំងអាជ្ញាធរគ្រប់លំដាប់ថ្នាក់ថែមទៀតផង ។
ដូច្នេះហើយទើបទាំងអាជ្ញាធរ កងកម្លាំង មន្ត្រីជំនាញ រួមទាំងប្រជាពលរដ្ឋតំបន់នោះតែងតែនិយាយតៗ គ្នាថា ក្រុមឧកញ៉ា សឹង្ហ សំអុល គឺជាក្រុមហ៊ុនរបស់ខុទ្ទកាល័យសម្តេច ហ៊ុន សែន ពេញៗមាត់តែម្តង។ សង្ឃឺឹមថានឹងមានការស្រាវជ្រាវពន្យល់ពីស្ថាបន័ថ្នាក់លើប្រសិនបើមិនមានការទទួលបានផលប្រយោជន៍ពីបទល្មើសនោះទេ!។
