មកុដបវរកញ្ញាចក្កវាឡរបស់ថៃប្រចាំឆ្នាំ២០១៧(Miss Unverse Thailand 2017)បានទៅលើកញ្ញាMareeya Poonlertlarbក្នុងវគ្គផ្តាច់ព្រ័ត្រ រៀបចំឡើងកាលពីថ្ងៃទី២៩ កក្កដានៅក្រុងបាងកក ។
កាសែតថៃកាលពីថ្ងៃទី៣០ កក្កដា ផ្សាយថា ការប្រកួតបវរកញ្ញាចក្កវាឡរបស់ថៃប្រចាំឆ្នាំ២០១៧ បានបញ្ចប់កាលពីថ្ងៃទី២៩ កក្កដា ។ លទ្ធផលបានទៅលើកញ្ញាMareeya Poonlertlarbដោយរៀបចំឡើងនៅលើវេទិកា«Royal Paragon Hall»ក្រុងបាងកក និងផ្សាយបន្តផ្ទាល់តាមទូរទស្សន៍ប៉ុស្តិ៍«3HD» ។
នាងMareeya Poonlertlarbនឹងក្លាយជាបេក្ខនារីតំណាងរបស់ថៃដើម្បីចូលរួមប្រកួតMiss Unverse 2017ពិភពលោក រៀបចំឡើងនៅថ្ងៃទី២៦ វិច្ឆិកា ២០១៧ ។ នាងបានទទួលរង្វាន់ចំនួនជាង២លានបាត មកុដពេជ្រ រថយន្តម៉ាកHondaមានតម្លៃ១,២លានបាត រួមទាំងរង្វាន់ផលិតផល ផ្សេងៗជាច្រើនទៀត ។
Mareeya Poonlertlarbមានអាយុ២៥ឆ្នាំ កម្ពស់១,៨៣ម៉ែត្រ ជាកូនកាត់ថៃ-ស៊ុយអែត អាចនិយាយភាសាថៃ អង់គ្លេស ស៊ុយអែត និងចិន ដោយរៀនចប់ថ្នាក់អនុបណ្ឌិតផ្នែកទីផ្សារនៅមហាវិទ្យាល័យ ប្រទេសស៊ុយអែត ៕
