មេទ័ពកំពូលមួយរូបនៃកងទ័ពកាណាដា បានប្រាប់សមាជិកសភា កាណាដាមិនអាចពឹងផ្អែកលើអាមេរិកដើម្បីការពារខ្លួនឡើយ ក្នុងករណីមានការវាយប្រហារពីសំណាក់កូរ៉េខាងជើងនោះ។ ឧត្តមសេនីយ៍ឯក Pierre St-Amand នៃកងទ័ពកាណាដានិយាយទៀតថា អាមេរិកគ្មាននយោបាយការពារកាណាដាដូចសម្ព័ន្ធមិត្តផ្សេងទៀតមានកូរ៉េខាងត្បូង និងជប៉ុនឡើយ។
កម្មវិធីនុយក្លេអ៊ែររបស់កូរ៉េខាងជើងមិនត្រឹមតែធ្វើឲ្យអាមេរិកបារម្ភតែឯងឡើយ សូម្បីតែសម្ព័ន្ធមិត្តរបស់អាមេរិកក៏នៅមិនសុខដែរ ព្រោះអាមេរិកក៏មិនអាចការពារពួកគេបានទាំងអស់ទេ។ អាមេរិកមានកិច្ចព្រមព្រៀងជាមួយកូរ៉េខាងត្បូង និងជប៉ុន ហើយថែមទាំងមានកងទ័ពប្រចាំការនៅប្រទេសទាំងពីរផងដែរ ដើម្បីការពារការគំរាមកំហែងរបស់កូរ៉េខាងជើង។ ប៉ុន្តែ កាណាដាដែលនៅជាប់អាមេរិកនោះ បែរជាគ្មានការអះអាងអ្វីពីអាមេរិកទេ។ នេះបើតាមការលើកឡើងរបស់មន្ត្រីយោធាជាន់ខ្ពស់កាណាដា។
ឧត្តមសេនីយ៍ឯក Pierre St-Amand មេបញ្ជាការរងកងទ័ពការពារអាកាសអាមេរិកខាងជើង បានប្រាប់គណៈកម្មាធិការការពារជាតិសភា ថា កាណាដាមិនអាចពឹងអាស្រ័យលើអ្នកជិតខាងរបស់ខ្លួនបានទេ បើកូរ៉េខាងជើងបាញ់នុយក្លេអ៊ែរដាក់នោះ។ បើតាមសារព័ត៌មាន BBC មន្ត្រីយោធាជាន់ខ្ពស់រូបនេះនិយាយដែរថា គេមិនឃើញមាននយោបាយដែលឲ្យអាមេរិកផ្ដល់ជំនួយដល់កាណាដាឡើយ ពេលមានសង្គ្រាមនោះ។
ជាមួយការបារម្ភពីសុវត្ថិភាពផ្ទាល់ខ្លួន កាណាដាមិនដែលចូលរួមជាមួយអាមេរិកក្នុងកម្មវិធីការពារមីស៊ីលបាលីស្ទិកទេ។ កម្មវិធីនេះ គឺជាផែនការរបស់ក្រុងវ៉ាស៊ីនតោនក្នុងការការពារខ្លួនពីការគំរាមកំហែងនៃមីស៊ីល ឬនុយក្លេអ៊ែរបស់ក្រុងព្យុងយ៉ាង។ ការព្រួបារម្ភកើនឡើងខ្លាំង ក្រោយកូរ៉េខាងជើងអាចផលិតមីស៊ីលដែលរត់បានចម្ងាយរាប់ពាន់គីឡូម៉ែត្រ ពោលគឺអាចវាយប្រហារគោលដៅនៅអាមេរិកខាងជើងតែម្ដង។
យ៉ាងណាមិញ លោក Mark Gwozdeckyឧបការរីរងរដ្ឋមន្ត្រីការពារជាតិជាន់ខ្ពស់ទទួលសន្តិសុខអន្តរជាតិ បានប្រាប់កិច្ចប្រជុំសភាដែរថា កាណាដាមិនមែនជាគោលដៅរបស់នុយក្លេអ៊ែរកូរ៉េខាងជើងទេ ព្រោះកាណាដាជាប្រទេសនិយមសន្តិភាព។ មន្ត្រីជាន់ខ្ពស់រូបនេះបញ្ជាក់ថា មកទល់ពេលនេះ គ្មានការគំរាមដោយផ្ទាល់ពីសំណាក់កូរ៉េខាងជើងទេ។
ដោយលើកឡើងពីដំណើរទស្សនកិច្ចរបស់ទីប្រឹក្សាសន្តិជាតិកាណាដានៅព្យុងយ៉ាងកាលពីខែសីហា លោក Mark Gwozdecky អះអាងថា កូរ៉េខាងជើងចាត់ទុកជាកាណាដាជាមិត្តភក្តិ និងជាប្រទេសដែលស្រឡាញ់សន្តិភាព។ ទោះជាយ៉ាងណាក្ដី លោក Gwozdecky នៅតែចាត់ទុកកម្មវិធីនុយក្លេអ៊ែររបស់កូរ៉េខាងជើង ជាការគំរាមសន្តិភាព និងស្ថិរភាពពិភពលោកដដែល៕ 