ភ្នំពេញ៖ បើមិនមានការប្រែប្រួលទេនោះ នៅថ្ងៃទី២៣ ខែតុលា ឆ្នាំ២០១៧ឆាប់ៗនេះ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងអញ្ជើញធ្វើពិធីបើកការដ្ឋាន សាងសង់ស្ពានបេតុងអារមេខ្សែកាបឆ្លងកាត់ទន្លេសាប តភ្ជាប់ពីផ្លូវជាតិលេខ៥ទៅផ្លូវជាតិលេខ៦ ដើម្បីរំដោះចរាចរណ៏ឲ្យកំណាត់ផ្លូវជាតិទាំងពីរនេះ មានភាពប្រសើរឡើង ជាពិសេសពង្វាង និងរំដោះចរាចរណ៏នៅតំបន់ស្ពានជ្រោយចង្វារ បន្ទាប់ពីស្ពានជ្រោយចង្វារចាស់ត្រូវបានបិទដើម្បីជួសជុល ។
គម្រោងការខាងលើនេះត្រូវបានលើកឡើងមន្ត្រីរដ្ឋបាលរាជធានីភ្នំពេញ បានឲ្យដឹងថា រដ្ឋាភិបាលគម្រោងសាងសង់ស្ពានបេតុងអារមេខ្សែកាបឆ្លងកាត់ទន្លេសាប តភ្ជាប់ពីផ្លូវជាតិលេខ៥ទៅផ្លូវជាតិលេខ៦ ក្នុងពេលឆាប់ៗនេះ ។
មន្ត្រីដដែល បានឲ្យដឹងទៀតថា ស្ពាននេះ ស្លិតនៅទីតាំងឆ្លងទន្លេសាបលើតម្រង់ផ្លូវសាលាដែកក្នុងខណ្ឌឫស្សីកែវនិងខណ្ឌជ្រោយចង្វារមានប្រវែងស្ពានសរុប ៩២២ម ទទឹង២០.៥ម ចិញ្ចើមស្ពានសម្រាប់ថ្មើរជើង ១.២៥មសងខាង កំពស់សរសរស្ពានសម្រាប់ព្យួរខ្សែកាបធៀបនឹងកម្រាលស្ពាន ៣៤ម សរសរសម្រាប់ព្យួរខ្សែកាបមានចំនួន ៤សរសរ គម្លាតពីគ្នា ១២០ម ។គន្លងខ្សែយានយន្តទទឹង ៣.៧៥ម គន្លងធ្វើចរាចរចំនួន ២ខ្សែទៅ ២ខ្សែមក ល្បឿនសុវត្ថិភាព ៤០គម ក្នុង១ម៉ោង កំពស់នាវាចរក្រោមស្ពាន អតិបរមានៅរដូវវស្សា ១០.៥ម កំពស់នាវាចរក្រោមស្ពាន អប្បបរមានៅរដូវប្រាំង ២០.៥ម បំពាក់បង្គោលភ្លើងបំភ្លឺ ព្រមទាំងដាក់ស្លាកសញ្ញាចរាចរផងដែរ ។
ដោយប្រទេសមានសុខសន្តិភាព និងមានការអភិវឌ្ឍន៍ ការធ្វើដំណើរឆ្លងកាត់ពីតំបន់មួយទៅតំបន់មួយពិតជាសំខាន់ណាស់ រាជរដ្ឋាភិបាលក៏បានសម្រេចចិត្តសាងសង់ស្ពានឆ្លងកាត់ទន្លេសាបថ្មីមួយទៀតទុកជូនប្រជាពលរដ្ឋ និងអ្នកធ្វើដំណើរទៅមកឆ្លងកាត់ពីតំបន់ជ្រោយចង្វារ មកតំបន់ឬស្សីកែវផ្លូវជាតិលេខ៥។
នារសៀលថ្ងៃទី១៧ ខែតុលា ឆ្នាំ២០១៧ ឯកឧត្តមអភិបាលរាជធានីភ្នំពេញ បានដឹកនាំប្រជុំត្រៀមរៀបចំពិធីបើកការដ្ឋានស្ពានឆ្លងកាត់ទន្លេសាបក្រោមអធិបតីភាពដ៏ខ្ពង់ខ្ពស់ សម្ដេចតេជោ ដែលត្រៀមបើកការដ្ឋាននៅថ្ងៃទី២៣ ខែតុលា ឆ្នាំ២០១៧ខាងមុននេះ។ ស្ពានថ្មីមួយនេះ ពិតជាមានសារៈសំខាន់ណាស់ក្នុងការចូលរួមបញ្ជៀសចរាចរណ៍ពីផ្លូវជាតិលេខ៦ ឆ្លងចូលផ្លូវជាតិលេខ៥៕
