រតនគិរី៖ អាជ្ញាធរខេត្តរតនគិរី និងតំណាងអង្គការភ្លែនអន្តរជាតិកម្ពុជាបានសម្ពោធគម្រោង «កូនឬស្សី» នៃកម្មវិធីគាំពារ និងនិងអភិវឌ្ឍកុមារតូចរបស់អង្គការភ្លែននៅព្រឹកថ្ងៃទី៩ខែសីហានេះនៅសាលាខេត្ត។
ចាប់ពីថ្ងៃទី៩ខែសីហាឆ្នាំ២០១៩ កុមារតូចអាយុក្រោម៦ឆ្នាំមកពីភូមិចំនួន៤០ នៃស្រុកវើនសៃ តាវែង អូរជុំ និងបរកែវ ក្នុងខេត្តរតនគិរី នឹងបន្តទទួលបានការបណ្តុះបណ្តាលពីគម្រោង «កូនឬស្សី»របស់អង្គការភ្លែនអន្តរជាតិកម្ពុជា។ គឺជាការបណ្តុះបណ្តាលផ្នែកបញ្ញា ស្មារតី សុខភាព និងកាយសម្បទាផង មុនពួកគេចូលរៀនថ្នាក់បឋមសិក្សា។
អាជ្ញាធរខេត្ត តំណាងអង្គការភ្លែនអន្តរជាតិកម្ពុជា តំណាងមន្ទីរអប់រំ និងគ្រូបង្រៀនថ្នាក់មត្តេយ្យ ប្រមាណ២០០នាក់បានជួបជុំគ្នានៅសាលាខេត្តរតនគិរីដើម្បីសម្ពោធការអនុវត្តគម្រោង កូនឬស្សី នេះ។
នៅក្នុងពិធីនោះ លោក យី គឹមថាន ប្រធានគ្រប់គ្រងកម្មវិធីជាតិនៃអង្គការភ្លែនអន្តរជាតិកម្ពុជា បានកត់សម្គាល់អំពីសារសំខាន់នៃការវិនិយោគលើកុមារតូច ដែលនឹងផ្តល់គុណប្រយោជន៍ដល់ពួកគេនៅថ្ងៃអនាគត។ លោក គឹមថាន បានបញ្ជាក់បន្ថែមយ៉ាងដូច្នេះថា៖«ការគាំពារ និងអភិវឌ្ឍកុមារតូច គឺជាការងារអទិភាព និងជាផ្នែកមួយមិនអាចខ្វះបាន ក្នុងការអប់រំសម្រាប់ទាំងអស់គ្នា ហើយក៏ជាយុទ្ធសាស្ត្រក្នុងការកាត់បន្ថយភាពក្រីក្រផងដែរ»។
អង្គការភ្លែនអន្តរជាតិបានចាប់ផ្តើមបេសកកម្មរបស់ខ្លួនលើកម្មវិធីគាំពារ និងអភិវឌ្ឍកុមារតូចនៅក្នុងខេត្តរតនគិរីនេះតាំងពីឆ្នាំ២០១២មកម្លេះ។ រហូតដល់ពេលនេះ អង្គការភ្លែន បានសហការសាងសង់បាន៣៧សាលាមត្តេយ្យសហគមន៍ ៥សាលាមត្តេយ្យចល័ត និង១សាលាមត្តេយ្យដែលមាន៣បន្ទប់។
តាមពិត គម្រោង កូនឬស្សី របស់អង្គការភ្លែន ត្រូវបានបង្កើតឡើងស្របនឹងគោលនយោបាយរបស់រដ្ឋាភិបាល។ កាលពីថ្ងៃទី១៩ ខែកុម្ភៈឆ្នាំ២០១០ កិច្ចប្រជុំគណៈរដ្ឋមន្ត្រីបានអនុម័តគោលនយោបាយជាតិមួយស្តីអំពីការគាំពារ និងអភិវឌ្ឍកុមារតូចនេះ ដែលតម្រូវឲ្យកុមារតូចទាំងអស់អាយុក្រោម៦ឆ្នាំ ពិសេសកុមាររងគ្រោះ ងាយរងគ្រោះ ក្រខ្សត់ ទទួលបានសេវាគាំពារ និងអភិវឌ្ឍ។
លោក លី វិន អភិបាលរងខេត្តរតនគិរី ដែលបានធ្វើជាអធិបតីសម្ពោធគម្រោង កូនឬស្សី នេះ បានប្រាប់អ្នកចូលរួមថា រដ្ឋាភិបាលតែងតែយល់ពីសារសំខាន់ នៃការគាំពារ និងអភិវឌ្ឍកុមារតូច ដែលជាគុណប្រយោជន៍ដល់អនាគតរបស់កុមារម្នាក់ៗ ដែលនឹងក្លាយខ្លួនជាសសរទ្រូងប្រទេសជាតិ។ ទន្ទឹមនឹងការណែនាំដល់មន្ត្រីអាជ្ញាធរតាមមូលដ្ឋានឲ្យពួកគេផ្តល់ភាពងាយស្រួលដល់ការអនុវត្តការងាររបស់អង្គការភ្លែននោះ លោកអភិបាលរង លី វិន បានបញ្ជាក់យ៉ាងដូច្នេះ៖«ការគាំពារ និងអភិវឌ្ឍកុមារតូច ជាការងារអាទិភាព ហើយជាផ្នែកមួយខានមិនបាននៅក្នុងក្របខណ្ឌនៃការអប់រំសម្រាប់ទាំងអស់គ្នា»។
កូនឬស្សី គឺជាឈ្មោះកម្មវិធីគាំពារ និងអភិវឌ្ឍកុមារតូចរបស់អង្គការភ្លែនអន្តរជាតិកម្ពុជា ដែលនឹងជួយកុមារតូចអាយុពី០ដល់៦ឆ្នាំដែលរស់នៅតំបន់ដាច់ស្រយាល ពិសេសកុមារជនជាតិដើមភាគតិច មុនពួកគេចូលរៀនថ្នាក់បឋមសិក្សា។ គម្រោង៣ឆ្នាំ (២០១៧-២០២០)នឹងត្រូវអនុវត្តនៅស្រុក បរកែវ អូរជុំ តាវែង និងវឺនសៃ នៃខេត្តរតនគិរី និងស្រុក ថាឡាបរិវ៉ាត់ និងស្រុកសៀមប៉ាង នៃខេត្តស្ទឺងត្រែង។ គម្រោងនេះមានត្រូវប្រើប្រាស់ថវិកាប្រមាណ១លានដុល្លារ។
អង្គការភ្លែនអន្តរជាតិកម្ពុជាបានចាប់ផ្តើមប្រតិបត្តិការរបស់ខ្លួននៅកម្ពុជាតាំងពីឆ្នាំ២០០២។ រហូតដល់ពេលនេះ អង្គការភ្លែនអន្តរជាតិបានសហការជាមួយអង្គការដៃគូក្នុងស្រុកដើម្បីបង្កើតឲ្យមានសាលាមត្តេយ្យសហគមន៍ជិត៤០០ និងក្រុមឪពុកម្តាយប្រមាណ១៦០០ក្រុម នៅក្នុងខេត្តតំបន់ប្រតិបត្តិការ សៀមរាប រតនគិរី ស្ទឹងត្រែង និងត្បូងឃ្មុំ៕